Mjög ungar stúlkur leita í Kvennaathvarfið í auknum mæli

Yfir 20 prósent þeirra kvenna sem komu í Kvennaathvarfið á liðnu ári segja ástæðu komunnar vera ofbeldi gegn börnum á heimilinu. Árlega eru dæmi um að nýfædd börn komi í athvarfið með mæðrum sínum.

Árið 2015 komu 74 börn til dvalar með mæðrum sínum í Kvennaathvarfinu, 40 stelpur og 34 strákar. Að jafnaði dvelja konur með börn lengur en barnlausar, en börn dvöldu í athvarfinu í að meðaltali 20 daga. Nærri fimmtíu prósent barnanna voru yngri en 6 ára, þar af 8 börn á fyrsta ári.

„Við erum á hverju ári með dæmi þess að börnin komi hingað bara beint af fæðingardeildinni. Móðirin ljúki jafnvel meðgöngu hér í húsinu og komi svo aftur strax af deildinni,“ segir Sigþrúður Guðmundsdóttir framkvæmdastýra Kvennaathvarfsins. 

Í ársskýrslunni kemur fram að fleiri konur en áður nefna ofbeldi gegn börnum sem ástæðu komu í athvarfið.

„Í fyrra voru 22 prósent kvennanna sem nefndu þessa tegund ofbeldis sem eina ástæðu þess að þau komu. Það eru þá kannski um það bil níutíu konur sem nefna þetta og hvað þær eiga mörg börn vitum við ekki, en það eru einhverstaðar á milli hundrað og tvö hundruð börn væntanlega á þessum heimilum,“ segir Sigþrúður.

Á hverju ári eru nokkur dæmi um stúlkur sem ekki eru orðnar 18 ára dvelji í athvarfinu vegna ofbeldis sem þær hafa orðið fyrir. Það er þá með samþykki forráðamanna eða fyrir tilstuðlan barnaverndaryfirvalda. Eru stúlkurnar skráðar sem konur í viðtalsskýrslum þó vissulega séu þær börn.

„Við erum að sjá, og höfum kannski undanfarið í auknum mæli verið að sjá, mjög ungar stúlkur koma. Stúlkur innan við tvítugt sem koma vegna ofbeldis af hálfu kærasta.“

Segir Sigþrúður að úrræði vanti fyrir þennan hóp.

„Stúlkur undir átján ára aldri eru náttúrlega börn og eiga þá heima í barnaverndarkerfinu. Ég er ekki viss um að það alltaf bjóði upp á lausnir sem hentar þessum stúlkum. Svo held ég að við sem almennt umgöngumst ungt fólk, til dæmis börn sem eru þó farin að vera í samböndum, að vera meðvituð um að ofbeldi getur hafist mjög snemma í samböndum.“