Ein af hverjum fimm konum fór aftur til ofbeldismannsins eftir dvöl í Kvennaathvarfinu

Rúm 20 prósent þeirra kvenna sem leituðu til Kvennaathvarfsins á liðnu ári kærðu ofbeldið sem þær höfðu orðið fyrir til lögreglu en það hlutfall hefur aldrei verið hærra í sögu athvarfsins. Þá sneru rúmlega 20 prósent kvennanna aftur heim til ofbeldismannsins eftir dvöl í athvarfinu, en 16 prósent fóru heim eftir að ofbeldismaðurinn hafði verið fjarlægður af heimilinu.

Þetta er á meðal þess sem fram kemur í ársskýrslu Samtaka um kvennaathvarf sem kemur út í dag, en allnokkur aukning var í aðsókn í Kvennaathvarf á árinu 2015 frá fyrra ári. 846 komur voru skráðar á árinu, 720 í viðtöl og 126 í dvöl.

Alls dvöldu 200 íbúar í athvarfinu, 126 konur og 74 börn og var dvalartími allt frá einum degi upp í 149 daga. Að meðaltali dvaldi hver kona í athvarfinu í 19 daga en börn að meðaltali í 20 daga. Þá voru 11 íbúara í húsinu að meðaltali á degi hverjum, 7 konur og 4 börn.

Konurnar sem komu í athvarfið voru á öllum aldri, eða frá 16 ára og upp í 82 ára en ofbeldismennirnir á aldrinum 18 til 83 ára. Þá voru börnin allt frá því að vera örfárra daga gömul en næri helmingur þeirra voru yngri en 6 ára, þar af 8 börn á fyrsta ári.

Langflestar kvennanna, eða 94 prósent, nefndu andlegt ofbeldi sem eina ástæðu komu í athvarfið, 60 prósent höfðu einnig verið beittar líkamlegu ofbeldi og 32 prósent kynferðislegu ofbeldi. Tæplega helmingur ofbeldismannanna voru eiginmenn eða sambýlismenn kvennanna þegar þær komu í athvarfið en 23 prósetn voru að flýja fyrrverandi eigin-eða sambýlismenn.  16 prósent komu vegna ofbeldis af hálfu kærasta eða fyrrverandi kærasta þar sem sambúð var ekki hafin.

Ársskýrslu Samtaka um kvennaathvarf má nálgast í viðhenginu hér að neðan.