Ljósið hlýtur Samfélagsverðlaunin

Ljósið, endurhæfingar- og stuðningsmiðstöð fyrir fólk sem hefur fengið krabbamein og aðstandendur þess, hlaut Samfélagsverðlaun Fréttablaðsins 2016. Samfélagsverðlaunin eru veitt samtökum sem hafa unnið framúrskarandi mannúðar- eða náttúruverndarstarf og lagt sitt af mörkum til að gera íslenskt samfélag betra fyrir alla.

Markmið Ljóssins er að fólk fái sérhæfða endurhæfingu og stuðning, þar sem fagfólk aðstoðar við að byggja upp líkamlegt og andlegt þrek, auk þess að fá stuðning við að setja sér markmið sem auka daglega virkni og hafa þannig áhrif á lífsgæði almennt.

Forseti Íslands, Ólafur Ragnar Grímsson, afhenti Samfélagsverðlaunin sem veitt voru í ellefta sinn í gær. Verðlaunaféð er 1,2 milljónir króna. Aðrir sem tilnefndir voru til Samfélagsverðlaunanna voru Frú Ragnheiður, sem er verkefni Rauða krossins. Verkefnið hefur þann tilgang að ná til jaðarsettra hópa í samfélaginu. Góðgerðarfélagið Thorvaldsensfélagið, sem hefur starfað frá 1875, var einnig tilnefnt.

Í flokknum Frá kynslóð til kynslóðar hlaut Dýrleif Skjóldal Ingimarsdóttir verðlaun fyrir óeigingjarnt og fórnfúst starf við sundþjálfun barna um nær tveggja áratuga skeið hjá sundfélaginu Óðni. Fyrstu árin sinnti hún sundþjálfuninni í sjálfboðavinnu. Aðrir tilnefndir í þessum flokki voru Marita fræðslan, sem er fræðslustarf fyrir börn og fullorðna um forvarnir gegn vímuefnum og áfengisneyslu, og Ólöf Kristín Sívertsen, grunnskólakennari og lýðheilsufræðingur. Hún er helsti hvatamaður þess að Mosfellsbær varð fyrsta heilsueflandi samfélag á Íslandi.

Verðlaun í flokknum Hvunndagshetjan hlaut Draumasetrið sem hjónin Ólafur Haukur Ólafsson og Elín Arna Arnardóttir reka. Draumasetrið er áfangaheimili fyrir þá sem eru að koma úr meðferð til að ná áttum og komast út í samfélagið á ný. Hlín Baldvinsdóttir var tilnefnd í þessum flokki fyrir mannúðarstörf á innlendum og erlendum vettvangi í nær tvo áratugi. Hermann Ragnarsson var tilnefndur fyrir hetjulega baráttu fyrir tvær albanskar flóttafjölskyldur.

Sólveig Sigurðardóttir hlaut verðlaun í flokknum Til atlögu gegn fordómum fyrir starf sitt við að eyða fordómum fyrir offitu og að vekja fjölda fólks til vonar um betra líf. Fréttasíðan Iceland News Polska var tilnefnd í þessum flokki. Fréttasíðan miðlar fréttum af daglegu lífi á Íslandi auk þess að miðla upplýsingum um íslenska siði, venjur og hefðir til lesenda. Tilnefningu hlaut einnig Tara Ösp Tjörvarsdóttir og átakið #égerekkitabú, sem opnaði á umræðu um geðsjúkdóma á Íslandi. Átakið fór af stað með grein Töru Aspar.

Heiðursverðlaunin að þessu sinni hlaut kynningar- og fjáröflunar­átakið Á allra vörum. Frá árinu 2008 hafa þær Elísabet Sveinsdóttir, Gróa Ásgeirsdóttir og Guðný Pálsdóttir safnað hundruðum milljóna í góðgerðarstörf og vakið verðskuldaða athygli á ýmsum málefnum.

Formaður dómnefndar var Kristín Þorsteinsdóttir, útgefandi og aðalritstjóri 365. Aðrir í dómnefnd voru Jóna Hrönn Bolladóttir prestur og Pawel Bartoszek, stærðfræðingur og pistlahöfundur.

Hátt í þrjú hundruð tilnefningar til Samfélagsverðlaunanna bárust frá lesendum. Dómnefnd tilnefndi þrjá í hverjum flokki nema í flokki Heiðursverðlauna. Þar var einn tilnefndur.