Fimm leikir án taps hjá Lokeren

Lokeren hefur heldur betur tekið við sér eftir að Rúnar Kristinsson tók við þjálfun þess um þarsíðustu mánaðarmót.

Lokeren er ósigrað í síðustu fimm leikjum sínum í belgísku úrvalsdeildinni en í kvöld kom liðið til baka og náði í stig gegn Standard Liege á útivelli. Lokatölur 1-1.

Sverrir Ingi Ingason og Ari Freyr Skúlason voru í byrjunarliði Lokeren og áttu báðir þátt í jöfnunarmarki liðsins sem Mijat Maric skoraði á 73. mínútu.

Rúnar hefur nú stýrt Lokeren í sjö deildarleikjum. Þrír þeirra hafa unnist, þrír endað með jafntefli og aðeins einn tapast.

Lokeren er í 11. sæti deildarinnar með 23 stig. Næsti leikur liðsins er gegn Waasland-Beveren á annan dag jóla.