Deilan á Biskupsstofu leyst með tólf mánaða starfslokasamningi

Kolbeinn Tumi Daðason skrifar 11. nóvember 2016 11:56

Óhætt er að segja að samstarf Ellisifjar og Agnesar hafi ekki gengið áfallalaust fyrir sig. Vísir

Ellisif Tinna Víðisdóttir, fyrrverandi framkvæmdastjóri kirkjuráðs, samdi um áframhaldandi laun í tólf mánuði frá starfslokum í september. Starfslokasamningurinn markar lokin á erfiðu ástandi á Biskupsstofu þar sem framkvæmdastjórinn og biskup hafa ekki átt skap saman.

Samkvæmt heimildum Vísis var almennur skilningur á því innan kirkjuráðs að samþykkja tólf mánaða starfslokasamning eftir það sem á undan var gengið. Samkomlagið var staðfest á fundi kirkjuráðs þann 23. september síðastliðinn.

Pressan greindi frá starfslokum Ellisifjar í gær þar sem fram kom að heildargreiðslur Þjóðkirkjunnar til Ellisifjar fyrir vinnu auk starfslokasamnings næmi 51 milljón króna. Oddur Einarsson, sem gegnt hefur stöðu framkvæmdastjóra kirkjuráðs tímabundið eftir brotthvarf Ellisifjar, þvertekur í samtali við Vísi fyrir að upphæðin sé svo há. Ellisif hafi verið starfsmaður á launum samkvæmt launatöflu starfsmanna BHM og öllum ætti að vera ljóst að upphæðin 51 milljón króna væri út úr kortinu.

Vinnusálfræðingur kallaður til

Kalla þurfti vinnustaðasálfræðing á vettvang vegna samstarfsörðugleika Ellusifjar og biskups, Agnesar M. Sigurðardóttur. Eftir því sem fréttastofa kemst næst stóð vinna sálfræðingsins, starfsmanns sálfræðiþjónustunnar Lífs og Sálar, yfir í nokkrar vikur.

Ellisif hætti störfum í ágúst og síðan hefur Oddur gegnt stöðu framkvæmdastjóra kirkjuráðs.

Ellisif var ráðin framkvæmdastjóri kirkjuráðs í mars 2015 og tók til starfa 1. apríl það ár. 33 sóttu um stöðuna og var Ellisif metin hæfust. Hún lét svo af störfum í ágúst eftir sautján mánaða starf og var í framhaldinu gengið frá samkomulagi um starfslok.

Deilt um reikninga

Ellisif gerði alvarlegar athugasemdir við framkomu biskups í bréfi til kirkjuráðs í janúar síðastliðnum. Agnes tjáði sig um málið í skriflegu svari til RÚV í apríl þar sem hún sagði deilurnar tengjast greinargerð lögfræðinga um valdmörk.

Í ljósi þess hefði hún stigið til hliðar sem forstöðumaður Biskupsstofu í viðkomandi máli. Sólveig Lára Guðmundsdóttir, vígslubiskup á Hólum, leysti biskup af hólmi í því hlutverki og var því tengiliður Biskupsstofu við vinnustaðasálfræðinginn.

Deilur Agnesar og Ellisifjar munu meðal annars hafa snúið að því hvort framkvæmdastjóri Kirkjuráðs, Ellisif, heyrði undir biskup eða kirkjuráð. Sömuleiðis um reikninga sem biskup skrifaði undir en framkvæmdastjóri kirkjuráðs skrifaði ekki undir að því er fram kom í frétt RÚV.

Tengdar fréttir

Mest lesið

Fleiri fréttir