Fór 2.500 kílómetra á pínulitlu mótorhjóli

Íslensk kona bíður nú staðfestingar á því að fá heimsmet skráð í Heimsmetabók Guinness. Heimsmetið er í óvenjulegri kantinum en það felst í því að ferðast rúmlega 2.500 kílómetra á smámótorhjóli.

Ferðalag Sigríðar Ýrar Unnarsdóttur hófst í Ohio-ríki í byrjun septembermánaðar og lauk 17. september í Nýju-Mexíkó. Með í för voru þrír Bandaríkjamenn. Tveir þeirra tóku einnig þátt í að setja metið en sá síðasti ók fylgdarbíl hópsins.

„Til að byrja með gekk þetta mjög vel þó undirbúningurinn hafi verið mikil pappírsvinna,“ segir Sigríður. Á níunda degi af tólf tók að halla örlítið undan fæti. Tveir samferðamenn hennar skaðbrenndust í mikilli sól og sá þriðji meiddi sig á kaktus. Sjálf hlaut Sigríður skurð á fæti þegar hún datt af hjóli sínu. „Það voru saumuð nokkur spor sem síðan rifnuðu upp þegar ég settist á hjólið á ný.“

Hrakfarirnar stöðvuðu þau ekki og komst hópurinn að lokum á leiðarenda. Þess er nú beðið að starfsmenn Guinness staðfesti það að fyrra met hafi verið slegið. Það met er 718 kílómetrar og var sett árið 2009. „Við skráðum för okkar með GPS-tækjum og myndavélum. Þá geymdum við allar kvittanir og allt sem okkur áskotnaðist á leiðinni. Í raun gerðum við allt í samræmi við það sem okkur var sagt í upphafi frá Guinness.“

Sigríður segir að það geti tekið allt að tólf vikur að fá staðfest að fyrra heimsmet hafi verið slegið en boðið er upp á flýtimeðferð sé þess óskað. „Við eigum von á niðurstöðu á allra næstu dögum. Ég trúi ekki öðru en að þetta fáist staðfest.“

Aðspurð um hvort hún hafi í hyggju að reyna við fleiri heimsmet segir hún að það sé aldrei að vita. „Ég er nú þegar með nokkur áhugaverð í huga en það verður að koma í ljós hvað verður úr því,“ segir Sigríður að lokum. 

Fréttin birtist fyrst í Fréttablaðinu.