Þarf að bregðast við tengslum við hryðjuverkasamtök

Salmann Tamimi, formaður Félags múslima á Íslandi, vill að stjórnvöld á Íslandi grípi til aðgerða vegna tengsla hryðjuverkasamtaka við móðurfélag Stofnunar múslima á Íslandi.

Osama Krayem, 23 ára sænskur ríkisborgari og meðlimur ISIS , sem handtekinn var í apríl grunaður um aðild að bæði hryðjuverkaárásunum í París og Brussel, starfaði fyrir móðurfélag Stofnunar múslima á Íslandi, Alrisalah.

 „Það þarf auðvitað að bregðast við þessu. Ég hef varað við þessari stofnun lengi,“ segir Salmann.

Umrætt móðurfélag er í Svíþjóð en Stofnun múslima á Íslandi er útibú frá því félagi og stýrt þaðan frá. Krayem starfaði fyrir móðurfélagið í Svíþjóð um tíma en hefur verið ákærður fyrir aðild að hryðjuverkaárásunum í París í fyrra.

Á vefsíðunni Independent segir að DNA af Krayem hafi fundist í íbúð sem árásarmennirnir höfðu haldið til í. Þá segir að hann sé grunaður um að hafa keypt ferðatöskurnar sem geymdu sprengjurnar sem sprungu á flugvellinum í Brussel síðastliðinn mars.

Í samtali við sænska ríkissjónvarpið um miðjan apríl sagði Hussein Al Daoudi, stjórnarmaður Alrisalah og stjórnarmaður Stofnunar múslima á Íslandi, að Krayem hafi starfað fyrir þá um tíma en það hafi ekki verið lengi.

„Hann var að vinna fyrir þá en ég hef áhyggjur. Ég vil ekki að félag sem hefur einhver tengsl við svona ofstækismenn sé starfandi hérna,“ segir Salmann og bætir við að Ísland gæti vel verið á lista hjá hryðjuverkahópum til dæmis fyrir að hafa samþykkt stríð á hendur Írak árið 2003.

Einn vondur en ekki allir

„Ef það skeður eitthvað hérna er enginn framtíð fyrir múslima á landinu. Það verður alltaf hræðsla í garð múslima þegar þeir eru glæpamennirnir en það þarf að passa að setja ekki alla undir sama hatt. Til dæmis er íslenskur einstaklingur ekki fulltrúi Íslendinga í heild og ef það er einn sem er vondur þá á það ekki við um alla Íslendinga,“ segir Salmann.

Allir stjórnarmenn Stofnunar múslima á Íslandi eru sænskir ríkisborgarar nema framkvæmdarstjórinn, Karim Askari, sem er íslenskur ríkisborgari. Í samtali við Fréttablaðið segist hann ekki vita mikið um mál Krayem. Hann hafi verið smiður hjá móðurfélagi Stofnunar múslima en það hafi aðeins verið í tíu daga. Hann sé ekki tengdur við félagið á nokkurn annan hátt.

Í svari frá greiningardeild ríkislögreglustjóra um það hvort verið sé að rannsaka möguleg tengst stofnunarinnar við hryðjuverkasamtök segir að hlutverk greiningardeildarinnar sé að leggja mat á skipulagða glæpastarfsemi og mögulega hættu á hryðjuverkum. Hins vegar tjái deildin sig ekki um einstök mál.