Flugumferðarstjórar ósáttir við að vera kennt um tafir á Secret Solstice

Hljómsveitin Die Antwoord lenti í töfum við komuna til landsins í dag og því varð að fresta tónleikum sveitarinnar á tónlistarhátíðinni Secret Solstice um nokkra klukkutíma. Í tilkynningu frá Secret Solstice kom fram að tafir hafi orsakast vegna þess að „flugumferðarstjórar hafi ekki mætt til vinnu.“

Tafirnar riðluðu dagskrá tónlistarhátíðarinnar nokkuð þar sem þurfti að skipta um tónleikastað en í stað þess að troða upp fyrr í kvöld á útisviðinu Valhalla voru tónleikarnir fluttir inn í tónleikastaðinn Hel.

Flugumferðarstjórar eru afar ósáttir við að vera kennt um þessar tafir en þeir hafa rakið ferðir vélar Die Antwoord sem kom í dag frá Amsterdam.

Sjá einnig: Secret Solstice: Die Antwoord seinkar vegna forfalla flugumferðarstjóra 

„Við viljum lýsa yfir vonbrigðum með það að sannleikurinn skuli vera svona skrumskældur,“ segir Sigurjón Jónasson, formaður Félags íslenskra flugumferðarstjóra. Flugumferðarstjórar standa í kjaradeilu við Samtök atvinnulífsins en þeir urðu kjarasamningslausir í fyrra.

Vandræðavélin, sem gerð er út frá WOW, kom upphaflega til landsins eldsnemma í morgun frá Los Angeles og hún átti eftir stutt stopp hér á landi að fara til Amsterdam og sækja farþega þar. Tafir urðu á vélinni í Los Angeles í nótt en hún átti að lenda hér á landi klukkan fjögur í nótt. Hún lenti þó ekki fyrr en hálf sjö.

Ekki hægt að klína töfum á eina stétt

Sigurjón segist ekki vita hvers vegna tafir urðu á vélinni, það hafi engar tafir verið á aðflugi á þessum tíma og því geti flugfélagið WOW eitt svarað fyrir tafirnar.

Þegar vélin hafði lent hér á landi frá Los Angeles í morgun þurfti að gera hana klára til loftaks að nýju áður en hún héldi til Amsterdam þar sem hún myndi sækja hljómsveitina og aðra farþega. Vélin hefði átt að leggja af stað klukkan sex í morgun en var ekki tilbúin til flugtaks fyrr en klukkan níu. Milli níu og hálftíu þurfti að loka vellinum vegna manneklu hjá flugumferðarstjórum. Vélin til Amsterdam fór því ekki í loftið fyrr en tuttugu mínútur fyrir tíu. 

„Það geta verið ýmsar ástæður fyrir töfum í flugi. Það er langt frá því að það sé hægt að kenna einni stétt alfarið um þetta, það er ekki gott að öllu sem misfarist sé klínt á eina stétt,“ segir Sigurjón. 

„Það er eitthvað annað sem býr að baki töfum á þessari flugvél heldur en forföll hjá flugumferðarstjórum, það er nokkuð ljóst.“ 

Tónleikar Die Antwoord voru færðir til og fara fram í tónleikasalnum Hel. Þeir áttu að vera undir berum himni á stóra sviði tónleikahátíðarinnar Valhalla. Spenntir tónleikagestir standa í röð fyrir utan og er nokkur óánægja með hversu fáir komast inn.

Hér að neðan má sjá stöðuna á röðinni klukkan hálf tólf í kvöld.