Ísraelar og Palestínumenn sögðu pass

Ísraelar og Palestínumenn taka ekki þátt í ráðstefnu sem miðar að því að blása lífi í friðarviðræður milli þjóðanna. Ráðstefnan hófst í París í gær. Hana sækja fulltrúar Sameinuðu þjóðanna, Arababandalagsins og um tuttugu þjóða.

Ætlunin er að fulltrúar landanna sem og stofnananna leggi grunninn að almennum friðarviðræðum sem færu fram undir lok þessa árs. Til að mynda með því að leggja fram hugmyndir um efnahags- og öryggisaðstoð sem ríkin myndu fá ef friði væri komið á.

François Hollande, forseti Frakklands, opnaði ráðstefnuna í gær.



„Við getum ekki talað máli hlut­aðeigandi á þessari ráðstefnu. Okkar framtak miðar að því að tryggja það að hugsanlegur friður yrði traustur og langvarandi undir eftirliti alþjóðasamfélagsins,“ sagði forsetinn. Hollande sagði enn fremur að viðræður þyrftu að taka mið af öllu svæðinu en ekki bara ríkjunum tveimur.

Sýn stjórnvalda ríkjanna tveggja á ráðstefnuna er misjöfn. Benjamín Netanjahú, forsætisráðherra Ísraels, segir hana tilgangslausa. Friði verði einungis komið á með beinum viðræðum ríkjanna tveggja. Þá sagðist Dore Gold, ráðuneytisstjóri utanríkisráðuneytisins, viss um að ráðstefnan myndi „misheppnast algjörlega“.

Mahmoud Abbas, forseti Palestínu, tekur ráðstefnunni hins vegar fagnandi. Segir hann ástæðuna meðal annars þá að hún gæti bundið enda á tveggja áratuga einokun Bandaríkjanna á sáttamiðlun.

Fáir þeirra erindreka sem ráðstefnunna sækja eru bjartsýnir. Frá því greinir BBC. Erindrekar eru sagðir almennt á þeirri skoðun að einhver tilraun til að blása lífi í viðræðurnar sé betri en engin en ekki er búist við miklum tímamótum í friðarviðræðum.

„Um þessar mundir er allt stopp,“ sagði Jean-Marc Ayrault, utanríkisráðherra Frakklands, um friðarviðræður Ísraels og Palestínu í viðtali við France Info Radio.

Viðræður hafa verið stopp frá því í apríl 2014 þegar Palestínumenn sökuðu Ísraela um að frelsa ekki fanga líkt og áður hafði verið samið um. Einkar stirt er á milli stjórnvalda ríkjanna en Ísraelar segjast þó tilbúnir til friðarviðræðna svo lengi sem ekkert ríki hefur milligöngu um þær.

Nokkur stóru átakamálanna sem standa í vegi fyrir friði er staða Jerúsalemborgar, landnemabyggðir Ísraela á Vesturbakkanum og sjálfstæði Palestínu. 

Fréttin birtist fyrst í Fréttablaðinu 4. júní.