Þessi mynd er of dónaleg fyrir Facebook

Sú mynd sem sjá má hér að ofan þykir of dónaleg fyrir Facebook. Þetta voru skilaboðin sem landssamtökin Göngum saman fengu frá tæknirisanum eftir að forsvarsmenn samtakanna höfðu keypt auglýsingar á Facebook til þess að vekja athygli á fjáröflunargöngum samtakanna sem fram fara víðsvegar um land á sunnudaginn.

Samtökin hafa í gegnum tíðina selt varning í fjáröflunargöngunum sem eru stærsta einstaka fjáröflunarleið félagsins sem hafa í gegnum tíðina veitt um 60 milljónum til vísindarannsókna en samtökin styrkja rannsóknir sem miðast að því að skilja betur uppruna og eðli brjóstakrabbameins.

Facebook með forrit sem leitar að kvenmannsbrjóstum

Í ár hannaði Lóa Hjálmýsdóttir mynd sem notuð er á bolum, höfuðklútum og innkaupapokum. Á myndinni má sjá tvær konur og sést vel í geirvörtur kvennanna. Þetta virðist vera of gróft fyrir Facebook sem tók út allar þær auglýsingar sem samtökin höfðu keypt á Facebook til að auglýsa gönguna.

„Okkur er sagt að Facebook sé með einhverskonar forrit sem leitar að kvenmannsbrjóstum,“ segir Margrét Baldursdóttir, ein af forsvarsmönnum Göngum saman. Hún segir að samtökin hafi keypt auglýsingar og notað þá mynd sem sést hér að ofan. Í dag hafi þau hinsvegar fengið þau skilaboð sem sjá mér að neðan frá Facebook um að ekki væri leyfilegt að auglýsa klámefni á samfélagsmiðlinum.

 

„Við erum ekki alveg nógu ánægð með að vera í þessum flokki en við tökum þessu nú ekki sérlega þungt vegna þess að ég held að það sé öllum ljóst að við séum ekki að dreifa klámefni,“ segir Margrét í samtali við Vísi.

Ekki nóg að setja gul strik til þess að fela geirvörturnar

Eftir að skilaboðin bárust frá Facebook og auglýsingin var tekin niður var reynt að bæta úr því með því að draga gult strik yfir geirvörturnar. Það var hinsvegar ekki nóg en þær auglýsingar voru einnig teknar niður af Facebook. Svo virðist sem að Facebook hafi einfaldlega bannað samtökunum að auglýsa á Facebook, með eða án geirvartna.

 

„Við reyndum þá að setja þessi gulu strik yfir til þess að laga málið. Það var ekki nóg. Svo prófuðum við að setja mynd af bara einhverju. Við prófuðum að setja mynd af flöskustút en það gekk ekki. Þá eru samtökin okkar, Göngum saman, bara bönnuð sem auglýsandi. Við erum algjörlega út í kuldanum hjá þessu fyrirtæki af því að við erum soddan dónar,“ segir Margrét í nokkuð gamansömum tóm en undirbúningur fyrir fjáröflunargöngur samtakanna, sem fara fram á sunnudaginn, er í fullum gangi.

Göngum saman eru landssamtök sem styrkja rannsóknir sem miðast að því að skilja betur uppruna og eðli brjóstakrabbameins. Á undanförnum árum hafa samtökin veitt um 60 milljónum til vísindarannsókna en Mæðradagsgöngurnar eru stærsti einstaki fjáröflunarviðburður félagsins. Fara þær fram á Mæðradaginn, sem er næstkomandi sunnudagur, á 16 stöðum á landinu.