Kári Stefánsson segir að tillaga Sigmundar Davíðs Gunnlaugssonar forsætisráðherra um að flytja fyrirhugaða spítalabyggingu frá Hringbraut að Vífilsstöðum benda til þess að þar með sé forsætisráðherra sestur í stjórnarandstöðu. Tillagan hafi verið sett fram sem stríðsyfirlýsing gegn samstarfsflokki Framsóknarflokksins í ríkisstjórn, Sjálfstæðisflokknum.

Þetta kemur fram í opnu bréfi sem Kári hefur skrifað til forsætisráðherra og birtist í Fréttablaðinu í dag. Fer Kári yfir feril Sigmundar Davíð sem forsætisráðherra. Segir Kári það vera með öllu fordæmislaust að ráðherra í samsteypustjórn gangi opinberlega gegn mikilvægum ákvörðunum ráðherra úr samstarfsflokki sínum.

„Það má leiða að því rök að þar með sért þú genginn í lið með stjórnarandstöðunnni og sitjir beggja vegna borðs, bæði sem forsætisráðherra og stjórnarandstöðuþingmaður,“ ritar Kári áður en hann heldur áfram. „Tillagan, sem í efni sínu var í það minnsta allt í lagi, var sett fram sem nokkurs konar stríðyfirlýsing gegn samstarfsflokki þínum í ríkisstjórninni og þeim aðilum sem veita heilbrigðismálum forystu í landinu.“

Sjá einnig: Kári segir að Sigmundi verði „hent út á eyrunum við næstu kosningar“

Kári segist vita að Sigmundur Davíð hafi rætt við landlækni um tillögu sína og hafi hann mælt gegn því að forsætisráðherra setti hana fram. Með því að setja fram þessa tillögu, sem Kári nefnir sprengju, hafi forsætisráðherra enn aukið á þá erfiðleika sem þarf að yfirstíga til þess að nýr spítali rísi sem fyrst. Það sé það sem skipti máli, ekki nákvæmlega hvar hann verði byggður líkt og Kári hefur áður sagt.

Forsætisráðherra fari í sjósund, horfi í spegil og segi: Það er gaman að vera forsætisráðherra
Kári fer um víðan völl í greininni og minnist meðal annars á brandara sem hann segir að gárungarnir segi um Sigmund Davíð.

„Á fyrstu tveimur árum þínum í forsætisráðherrastóli kvartaði stjórnarandstaðan oft undan fjarveru þinni úr þingsal og því að þú væri gjarnan í fríi og það næðist ekki í þig. Sannist hér hið fornkveðna að enginn veit hvað átt hefur fyrr en misst hefur. Nú þjáist nefnilega ekki bara stjórnarandstaðan og stjórnin heldur þjóðin öll af skorti á fjarveru þinni.“

Sjá einnig: Sigmundur Davíð segir Kára yfirgangssegg og besservisser

Kári segir að upphaflega hafi Sigmundur Davíð komið inn í íslensk stjórnmál eins og ferskur vindur á vordegi en fljótlega hafi farið að halla undan fæti. Telur hann líklegt að það hafi verið ákveðið áfall fyrir ungan mann eins og Sigmund að verða forsætisráðherra og segir margt benda til þess að Sigmundur Davíð telji sig ekki eiga skilið að gegna því embætti. Kári hefur þó ráð á reiðum höndum fyrir Sigmund Davíð til þess að vinna bug á þeirri tilfinningu.

„Þú ferð út í Nauthólsvík í hádeginu á miðvikudögum, slæst í hópinn með sjósundsfólkinu og dvelur nokkrar mínútur í ísköldu vatninu. Þú ferð beint þaðan niður í stjórnarráð, sest fyrir framan spegil og horfir svo hvasst í augun á sjálfum þér að þú verðir að horfa undan og horfir svo til baka og segir aftur og aftur: það er gaman að vera forsætisráðherra, það er gaman að vera forsætisráðherra þangað til þú ferð að trúa því sjálfur.“

Lesa má opið bréf Kára Stefánssonar til Sigmundar Davíðs í heild með því að smella hér.