Sigmundur Davíð segir Kára yfirgangssegg og besservisser

Sigmundur Davíð Gunnlaugsson forsætisráðherra vandar Kára Stefánssyni, forstjóra Íslenskrar erfðagreiningar ekki kveðjurnar í aðsendri grein sem birtist í dag, undir yfirskriftinni „Toppari Íslands“. 

Tilefni skrifa forsætisráðherra eru án nokkurs vafa grein Kára hvar fyrirsögnin er „Einnota ríkisstjórn“ og birtist fyrir skömmu.

Hitti „topparann“ í samkvæmi

Sigmundur Davíð nefnir Kára aldrei á nafn, kallar hann „Toppara“ og í lýsingum forsætisráðherra má ljóst vera að þar fer ábyrgðarlaus yfirgangsseggur sem lætur staðreyndir ekki þvælast fyrir sér; með öðrum orðum alger besservisser sem veit allt betur en allir aðrir:

„En topparar láta staðreyndir eða framtíðina ekki þvælast mikið fyrir sér. Fyrir þá er aðalatriðið að vera maður líðandi stundar, sá sem fangar athyglina og verður vinsæll meðal trúgjarnra um sinn. Aðrir geta séð um að fást við afleiðingarnar,“ skrifar Sigmundur Davíð í lok greinar sinnar.

Sigmundur Davíð hefur grein sína á að lýsa manni sem hann rakst á fyrir löngu í samkvæmi. mann sem talaði yfir allt og alla, vissi allt betur en aðrir og taldi sig geta gert öðrum mönnum betur.

Yfirgangssamur besservisser

„Enginn var betri í viðskiptum en hann en samt var ekki til meiri mannvinur, því hann mátti að eigin sögn ekkert aumt sjá. Það var líka sama hvaða sögur aðrir gestir sögðu, alltaf bætti hann um betur. Hann hafði gert merkilegri hluti, séð meira en aðrir og unnið stærri sigra. Hann taldi sig líka alltaf kunna betri brandara en hinir og sá því enga ástæðu til að leyfa öðrum að ljúka sínum skemmtisögum áður en hann kom með aðra betri. Í hvert sinn sem hann tók orðið var það auk þess gert af yfirlæti og gefið til kynna að allir aðrir en hann væru fábjánar. Þegar reynt var að leiðrétta eina eða tvær af fjölmörgum rangfærslum þessa samkvæmis­ljóns brást hann hinn versti við og gerði lítið úr þeim sem dirfðust að gera slíkar athugasemdir.“

Sigmundur beinir næst spjótum sínum að hugmyndum Kára um stóraukið framlag til heilbrigðiskerfisins, eða 150 milljarða, en það skjóti skökku við því engin ríkisstjórn hefur aukið framlög til heilbrigðismála sem og sú sem nú situr.

Áhugamenn um þjóðfélagsmál ættu ekki að láta þessa grein forsætisráðherra fram hjá sér fara.