Íslensk skip miða áfram við 100 þúsund tonn af loðnu

Ákvörðun Hafrannsóknarstofnunar um 100 þúsund tonna loðnukvóta til íslenskra skipa stendur. Þetta er niðurstaðan að loknum mælingum á loðnustofninum í kringum landið frá 1.-17. febrúar. Engar breytingar á að gera á áður útgefinni ráðgjöf um aflamark. Þetta kemur fram í tilkynningu frá stofnuninni.

Sérstök umræða var um málið á Alþingi í vikunni þar sem Kristján L. Möller, þingmaður Samfylkingar, lýsti áhyggjum sínum með mat Hafró á loðnustofninum í janúar. Var veiðistofninn metinn um 675 þúsund tonn en ráðlögð veiði er 177 þúsund tonn. Af þeim er leyfilegur afli íslenskra skipa 100 þúsund tonn.

Tólf milljarðar króna á 100 þúsund tonn

Kristján sagði að hafa yrði í huga að 100 þúsund tonn af loðnu væru um 12 milljarða króna virði. Matið væri byggt á niðurstöðum annarra tveggja vikna sem rannsóknir stóðu yfir. Veður og aðstæður hefðu hamlað rannsókninni.

Af þeim sökum var farið í aðra mælingu í febrúar sem var fjármögnuð af hagsmunaaðilum. Tilkynnningu Hafró má lesa í heild að neðan en þar kemur fram að ennþá minni loðna, um 500 þúsund tonn af kynþroska loðnu, hafi fundist í annarri mælingunni í síðari leiðangrinum. Enn minna hafi fundist í hinni mælingunni.

Fram kemur að veðuraðstæður hafi aftur hamlað rannsókninni. Lagt sé til að gera ekki breytingar á áður útgefinni ráðgjöf. 

Fréttatilkynning frá Hafrannsóknastofnun:

Mælingar á stærð loðnustofnsins í febrúar 2016

Vetrarmæling á loðnustofninum fór fram á rannsóknaskipunum Bjarna Sæmundssyni og Árna Friðrikssyni dagana 1. – 17. febrúar 2016 með það að markmiði að endurmeta stærð veiðistofns loðnu. Áður hafði verið farið á Árna Friðrikssyni til vetrarmælingar dagana 3. - 21. janúar. Haldið var aftur til

mælinganna með aðkomu hagsmunaaðila sem þátt tóku í fjármögnun leiðangursins.

Rannsóknasvæðið var landgrunnið og landgrunnsbrúnin frá Grænlandssundi, vestur með Norðurlandi og allt að sunnanverðum Austfjörðum. Veður hamlaði mælingum mikinn hluta tímans sem skipunum var haldið úti, en tvær yfirferðir náðust fyrir austan land þar sem mest var af loðnu.

Sú fyrri fór fram dagana 3. - 9. febrúar, að mestu á Bjarna Sæmundssyni frá Austfjörðum norður um og allt vestur fyrir Kolbeinseyjarhrygg þar sem við tók yfirferð Árna Friðrikssonar vestur í Grænlandssund. Síðari yfirferðin náðist dagana 10. - 16. febrúar, í upphafi á báðum rannsóknaskipunum en 12. febrúar hætti

Bjarni þátttöku vegna annarra verkefna og mælingin kláruð á Árna Friðrikssyni ásamt því að grænlenska uppsjávarskipið Polar Amaroq aðstoðaði við leit og afmörkun rannsóknasvæðisins.

Loðna fannst aðallega fyrir Austurlandi, en einnig dreift með landgrunnsbrúninni vestur með Norðurlandi og allt vestur í Grænlandssund en þar var loðnan að miklu leyti ókynþroska. Um 500 þúsund tonn af kynþroska loðnu (um 23 milljarðar fiska) mældust í fyrri yfirferðinni dagana 3. - 9. febrúar, sem er nokkru minna en mældist í janúar þegar um 675 þúsund tonn mældust jafnvel þó

tekið sé tillit til veiða og afráns. Mun minna mældist í síðari yfirferðinni enda veðurskilyrði verri á meðan á henni stóð.

Ennfremur er þekkt að erfiðlega gengur að mæla loðnu þegar styttist í og eftir að

hún gengur upp á grunninn til hrygningar.

Í ljósi niðurstaðna úr leiðangrinum sem og veiða og afráns frá því að mælingar fóru fram í janúar, auk þess sem að veður hamlaði rannsókninni ítrekað, leggur Hafrannsóknastofnun ekki til breytingar á áður útgefinni ráðgjöf um aflamark.