„Zlatan hefur ákveðið sig“

Zlatan Ibrahimovic mun samkvæmt heimildum fréttamiðilsins Yahoo í Frakklandi hafa ákveðið að vera um kyrrt hjá PSG og að hann muni skrifa undir eins árs framlengingu á samningi sínum.

Núverandi samningur Zlatan við PSG rennur út í sumar og var jafnvel reiknað með því að hann myndi leita á önnur mið í sumar.

En samkvæmt Yahoo hafa forráðamenn PSG boðið Zlatan afar hagstæðan samning sem gildir í eitt ár. Eftir það stendur honum til boða að gerast sendiherra fyrir félagið.

Sjá einnig: Er Zlatan að fara til Englands

„Leikmaðurinn hefur ákveðið að halda áfram ævintýri sínu í París,“ segir í frétt Yahoo en sænskir fjölmiðlar hafa einnig tekið málið upp.

Félög víða um heim munu hafa sýnt Zlatan áhuga, svo sem lið í Kína, Bnadaríkjunum, Englandi sem og bæði AC Milan og Inter á Ítalíu.

Zlatan er 34 ára og hefur verið hjá PSG síðan 2012. Þar hefur hann skorað 96 mörk í 111 leikjum.