Hollande hrósað fyrir að náða konu sem drap ofbeldisfullan eiginmann

Almenn ánægja hefur verið með ákvörðun François Hollande Frakklandsforseta um að náða konu sem dæmd var í tíu ára fangelsi fyrir að hafa skotið eiginmann sinn til bana.

Maðurinn hafði ítrekað nauðgað konunni og þremur dætrum þeirra á nokkurra áratuga tímabili.

Mál hinnar 68 ára Jacqueline Sauvage hefur vakið mikla athygli í Frakklandi og höfðu rúmlega 400 þúsund manns ritað undir áskorun til forsetans um að náða konuna.

Í frétt BBC kemur fram að lögmaður konunnar segi ákvörðun Hollande ekki einungis vera skilaboð til Sauvage heldur allra þeirra kvenna sem beittar eru ofbeldi.

Í frétt Aftonbladet kemur fram að konan hafi verið gift manninum í 47 ár þar sem hann ítrekað nauðgaði henni og dætrum þeirra, auk þess að beita þeim og syni hjónanna líkamlegu ofbeldi.

Degi eftir að sonur hjónanna framdi sjálfsvíg í september 2012, skaut konan manninn þrívegis í bakið með þeim afleiðingum að hann lést.

Konan sagðist hafa skotið manninn í sjálfsvörn og fékk tíu ára dóm. Henni verður sleppt í apríl eftir að hafa þá setið inni í rúm þrjú ár.

Hollande náðaði konuna eftir að hafa átt fund með dætrum konunnar og lögmanni hennar fyrir helgi.

Þetta er einungis í annað sinn sem Hollande náðar fanga, en áður hafði hann náðað dæmdan bankaræningja sem hafði setið í fangelsi í 38 ár.