Tuttugu ár frá fjöldamorðum á múslimum í Srebrenica

Líkamsleifar 136 einstaklinga verða færðar til greftrunar í dag í bænum Srebrenica í Bosníu.

Tuttugu ár eru síðan grimmileg fjöldamorð áttu sér stað í Srebrenica í Bosníu. Um átta þúsund múslimskir menn og drengir voru myrtir árið 1995 af bosníu-serbneskum hermönnum.

Nýlega var lokið við að bera kennsl á þá 136 einstaklinga sem fluttir voru til greftrunar í dag en búið er að bera kennsl á 6.241 fórnarlamb fjöldamorðanna.

Fyrir skemmstu beittu Rússar neitunarvaldi sínu í öryggisráði Sameinuðu þjóðanna til að koma í veg fyrir að fjöldamorðin yrðu skilgreind sem þjóðarmorð.