Tveir dópaðir ökumenn reyndu að stinga lögregluna af

Ökumaður á jeppa sinnti ekki stöðvunarmerkjum lögreglumanna, en þeir voru við eftirlit í ómerktum bíl skammt frá Hamraborg í Kópavogi á tólfta tímanum í gær.

Ökumaðurinn gaf í og stakk af en lögreglan fann bílinn mannlausan skömmu síðar. Þeim tókst svo í framhaldinu að handtaka þrjá menn sem voru á hlaupum frá bílnum. Ökumaðurinn reyndist undir áhrifum fíkniefna og var hann og farþegarnir tveir vistaðir í fangageymslum í nóttt og bíða yfirheyrslu í dag.

Annar ökumaður lét  sér detta í hug að stinga lögregluna á Selfossi af í nótt, en gafst fljótt upp. Hann var undir áhrifum fíkniefna, lítilræði af fíkniefnum fanst í bílnum, sem var ótryggður og ökuþórinn var próflaus.