Ragnar og félagar fyrstir til að leggja CSKA að velli

Ragnar Sigurðsson og félagar í Krasnodar unnu frábæran 2-1 sigur á CSKA Moskvu á heimavelli í dag en þetta var fyrsta tap CSKA Moskvu í rússnesku deildinni í ár.

Ragnar var á sínum stað í vörninni og lék allar nítíu mínútur leiksins en með sigrinum skaust Krasnodar upp í 5. sæti með 24 stig að 15 leikjum loknum.

Fedor Smolov kom Krasnodar yfir á 18. mínútu en Alan Dzagoev jafnaði metin fyrir CSKA tíu mínútum síðar.

Smolov bætti við öðru marki sínu og öðru marki Krasnodar aðeins tveimur mínútum eftir jöfnunarmark Dzagoev en það reyndist vera sigurmark leiksins.