Kári bar fyrirliðabandið í öruggum sigri | Ari Freyr lagði upp sigurmarkið gegn Viborg

Kári Árnason bar fyrirliðabandið í 5-0 sigri Malmö á neðrideildarliði Götene í annari umferð sænska bikarsins í dag en leikurinn fór fram á heimavelli Götene.

Kári bar fyrirliðabandið í fjarveru Markus Rosenberg en Malmö fékk sannkallaða draumabyrjun þegar Vladimir Rodi kom Malmö yfir eftir aðeins 28 sekúndur. Tíu mínútum síðar bætti Rodi við marki og Jo Berget gerði út um leikinn undir lok fyrri hálfleiks með þriðja marki Malmö.

Berget bætti við öðru marki í seinni hálfleik en Simon Kroon skoraði fimmta og síðasta mark Malmö undir lok leiksins og gulltryggði 5-0 sigur.

Í dönsku úrvalsdeildinni skutust Ari Freyr Skúlason, Hallgrímur Jónasson og félagar í OB Odense upp í 8. sæti með 1-0 sigri á Viborg á útivelli.

Ari og Hallgrímur voru í byrjunarliði OB og léku allar 90. mínútu leiksins en Ari lagði upp sigurmark leiksins fyrir Rasmus Festersen á 71. mínútu leiksins.