Stýrði liðinu í einum leik, vann titil og hætti

Dan Petrescu, fyrrum leikmaður Chelsea, hefur verið ráðinn nýr þjálfari Íslendingaliðsins Jiangsu Sainty í Kína. Þeir Viðar Örn Kjartansson og Sölvi Geir Ottesen leika með liðinu.

Petrescu hætti hjá rúmenska liðinu Targu Mures til að fara til Kína en hann var búinn að starfa hjá Targu Mures í aðeins fáeinar vikur.

Hann afrekaði þó að vinna titil í eina keppnisleik sínum hjá Targu Mures er félagið vann ofurbikarinn í Rúmeníu með 1-0 sigri á Steaua Búkarest. Þetta er fyrsti titill Targu Mures í sögu félagsins og tókst því Petrescu að skrá nafn sitt í sögubækur félagsins þrátt fyrir stutta dvöl þar.

„Það er mjög erfitt fyrir mig að yfirgefa liðið nú,“ sagði Petrescu. „Ég veit ekki hvernig þetta verður í Kína. Ég vona að þetta verður svipað og í Rússlandi,“ bætti hann við en hann var áður þjálfari Dynamo Moskvu og Kuban Krasnodar.