Viðar og Sölvi fá nýjan þjálfara

Viðar Örn Kjartansson, Sölvi Geir Ottesen og félagar þeirra í kínverska liðinu Jiangsu Guoxin-Sainty hafa fengið nýjan þjálfara.

Sá heitir Choi Yong-soo og er frá Suður-Kóreu. Hann stýrði síðast FC Seoul í heimalandinu. Hann lék á sínum tíma 69 landsleiki og skoraði í þeim 27 mörk.

Sjá einnig: Þjálfari Viðars og Sölva rekinn.

Yong-soo tekur við starfinu af Gao Hongbo sem var rekinn eftir 4-1 tap Jiangsu fyrir Shanghai SIPG um síðustu helgi en það var þriðja tap liðsins í síðustu fjórum leikjum.

Jiangsu er í 6. sæti kínversku ofurdeildarinnar með 22 stig eftir 16 umferðir. Viðar Örn er markahæsti leikmaður liðsins á tímabilinu með sex mörk.