Guardiola: Þrái ekki titla heldur að vera elskaður

Pep Guardiola, þjálfari Þýskalandsmeistara Bayern München, segir titlasöfnun ekki það sem drífi hann áfram í starfi sínu.

Spánverjinn, sem flestir telja gjörsamlega þrá stóra titla, vill einfaldlega bara finna fyrir ást.

Guardiola hefur unnið fimm landstitla og meistaradeildina tvisvar sinnum á fyrstu sex árum sínum sem þjálfari Barcelona og Bayern München.

„Ef þið viljið vita hvað ég vil fá í lífinu og í mínu starfi, þá er það að vera elskaður. Ég vil ekkert meira en það. Í alvöru þá eru titlar ekki það sem ég leita að,“ sagði Guardiola í fyrirlestri um leiðtogahæfni á dögunum.

Að því sögðu viðurkennir Guardiola að erfitt getur verið að sýna leikmönnum sínum ást, sérstaklega þegar þeir eru settir á bekkinn.

„Leikmenn móðgast þegar þeir eru ekki í liðinu því þeir halda að mér líki ekki við þá. Þeir pæla ekki einu sinni í hvort þetta getur verið út af taktík heldur ákveða að þeir finni ekki fyrir ást,“ segir Guardiola.

Hann sagði sögu af því þegar hann fór með einum stjörnuleikmanni sínum á kaffihús og hvernig ástin hafði stór áhrif á viðkomandi leikmann.

„Við töluðum um lífið og tilveruna en ekkert um fótbolta. Í næsta leik skoraði hann tvö af fjórum mörkum liðsins. Hann fann fyrir einhverju sérstöku því honum fannst hann elskaður,“ sagði Pep Guardiola.