„Samningar lækna marka upphaf endalokanna“

Karl Garðarsson, þingmaður Framsóknarflokksins, hefur áhyggjur af því hvaða þýðingu nýtilkominn samningur lækna í Læknafélagi Íslands við íslenska ríkið muni hafa fyrir aðrar stéttir í landinu.

„Í sjálfu sér má fagna því að samningar skuli hafa náðst í læknadeilunni, enda óþolandi staða gagnvart mörgum sjúklingum,“ hefur Karl pistil sinn á Facebook á en slær þó varnagla.

„Tel þó að þessir samningar muni marka upphaf endalokanna hvað varðar þann stöðugleika sem hefur ríkt undanfarið ár. Fleiri stéttir munu fylgja á eftir, verðbólga fer á stað og lán landsmanna taka ný stökk upp á við,“ segir Karl.

„Við munum sjá gamalkunnugt stef víxlverkunar launahækkana og verðbólgu og það verður almenningur sem situr eftir með sárt ennið. Það er því best að fara sér hægt í óbærilegri kæti og léttleika.“

Skrifað var undir nýjan kjarasamning lækna í húsakynnum ríkissáttasemjara um klukkan 3:30 í nótt. Engar upplýsingar liggja fyrir um innihald samningsins að svo stöddu en hann verður kynntur félagsmönnum í næstu viku.

Post by Karl Garðarsson.