Ronaldo gefur lítið fyrir skoðanir Wengers um Gullboltann

Cristiano Ronaldo gefur lítið fyrir skoðanir Arsene Wengers, knattspyrnustjóra Arsenal, um Gullboltann sem besti leikmaður heims fær hvert ár.

Wenger hefur tekið harða afstöðu gegn Gullboltanum sem og öllum einstaklingsverðlaunum en fyrir leikinn gegn Tottenham um helgina sagði Frakkinn:

„Ég er á móti Gullboltanum og öllum þessum hlutum. Ég hef séð menn eyðileggja ferla sína því þeir hafa verið of uppteknir að elta þessi einstaklingsverðlaun.“

„Þetta ýtir undir eigingirni í boltanum. Menn reyna of mikið sjálfir þegar félagi þeirra er kannski í betri stöðu. Umboðsmenn hvetja leikmenn stundum til að ná í þessi verðlaun og því er ég á móti þeim,“ sagði Wenger.

Ronaldo er búinn að vinna Gullboltann sem besti leikmaður heims tvö ár í röð og þrisvar í heildina. Hann vildi því eðlilega ekki gera jafn lítið úr verðlaunum og Wenger í viðtali við London Evening Standard en fór þó ekki í neitt skítkast við Wenger.

„Þetta eru hans skoðanir og ég virði þær en lengra nær það ekki,“ sagði Cristiano Ronaldo.