Skipulagsbreytingar hjá 365

Ákveðið hefur verið að ráðast í skipulagsbreytingar hjá dagskrársviði 365 til að laga starfsemi félagsins að síbreytilegu umhverfi og breyttum áherslum í áhorfsvenjum og kröfum áhorfenda. Þetta kemur fram í tilkynningu frá fyrirtækinu. Samhliða hefur tólf manns verið sagt upp hjá fyrirtækinu. Flestir störfuðu á framleiðsludeild.

Jón Gnarr, framkvæmdastjóri dagskrársviðs, segir framtíðarsýn sviðsins skýra og markmiðið að auka framboð af vönduðu íslensku sjónvarpsefni jafnt og þétt. Áhersla verði lögð á þróun og gæði á öllu leiknu efni, heimildar- og fréttaþáttum, íþróttaefni og efni fyrir útvarp.

„Dagskrársvið hefur sett á laggirnar sérstaka handritadeild sem gegnir því hlutverki að skapa, þróa og framleiða innlent efni fyrir alla miðla 365. Hrefna Lind Heimisdóttir hefur verið ráðin ritstjóri dagskrársviðs og mun stýra deildinni ásamt Jóni,“ segir í tilkynningunni.

Eva Georgsdóttir tekur við sem framleiðslustjóri af Gísla Berg sem gegnt hefur stöðunni undanfarin ár. Jóhanna Margrét Gísladóttir verður dagskrárstjóri.

„Þetta er rosalega spennandi verkefni enda mikil tækifæri í íslenskri dagskrárgerð. Tilgangur okkar og hlutverk er að skapa lifandi heimildir um samtíma okkar og sögu og setja fram á skemmtilegan og áhugaverðan hátt. Ég vonast til þess að áhorfendur eigi eftir að sjá mjög jákvæðar breytingar á dagskránni á næstu misserum, meira af vandaðri íslenskri dagskrá segir Jón Gnarr.

Uppfært klukkan 15:53 með upplýsingum um fjölda uppsagna