Gerrard og félagar í Galaxy úr leik í fyrstu umferð úrslitakeppninnar

Fyrsta úrslitakeppni Steven Gerrard í bandarísku MLS-deildinni var stutt gaman því ríkjandi meistarar Los Angeles Galaxy féllu út í fyrstu umferð á móti Seattle Sounders.

Seattle Sounders vann leikinn 3-2 eftir að liðsmenn LA Galaxy höfðu tvisvar náð að jafna metin, í 1-1 og 2-2. Seattle Sounders liðið er þar með komið áfram í undanúrslit Vesturdeildarinnar þar sem liðið mætir annaðhvort Vancouver Whitecaps eða FC Dallas.

Clint Dempsey skoraði fyrsta mark Seattle Sounders í leiknum strax á 5. mínútu en hin mörk liðsins skoruðu þeir Nelson Valdez og Erik Friberg. Erik Friberg skoraði sigurmarkið og eina mark seinni hálfleiksins á 73. mínútu.

Sebastian Lletget og Gyasi Zardes skoruðu mörk LA Galaxy en liðið þarf að styrkja varnarleikinn sinn fyrir næsta tímabil ætli það sér að komast lengra.

Steven Gerrard vann aldrei enska meistaratitilinn með Liverpool og ekki byrjar titlasöfnun hans vel hjá LA Galaxy.

Los Angeles Galaxy var búið að vinna bandarísku deildina þrisvar sinnum á síðustu fjórum árum og Robbie Keane var með í öllum titlinum. Robbie Keane spilaði allan leikinn í nótt alveg eins og Steven Gerrard.

Steven Gerrard spilaði 13 leiki á sínu fyrsta tímabili með Los Angeles Galaxy og var með 2 mörk og 3 stoðsendingar.

Robbie Keane skoraði 20 mörk og gaf 8 stoðsendingar í 24 leikjum á tímabilinu. Hann hefur nú skorað 73 mörk í 108 leikjum í MLS-deildinni frá því að hann kom til Los Angeles Galaxy árið 2011.