Stingur upp á árlegri sýningu BRICS-ríkja

Leiðtogaráðstefna BRICS-ríkjanna hófst í rússnesku borginni UFA, um 1.100 kílómetra austur af Moskvu, í gær. Ráðstefnuna sækja Dilma Rousseff, forseti Brasilíu, Vladimír Pútín, forseti Rússlands, Narendra Modi, forsætisráðherra Indlands, Xi Jinping, forseti Kína og Jacob Zuma, forseti Suður-Afríku.

Modi stakk upp á því á ráðstefnunni í gær að ríkin fimm héldu árlega sýningu þar sem framleiðendur frá ríkjunum kæmu saman og sýndu sitt besta. Bauðst hann einnig til að halda fyrstu sýninguna á Indlandi á næsta ári. Hann hvatti ríkin til þess að vinna saman og læra hvert af öðru.

Vladimír Pútín tekur undir þetta en forsetinn er sagður vilja leita stuðnings BRICS-ríkjanna gegn Vesturlöndum sem nú standa andspænis Pútín vegna stríðsins í Úkraínu. „Ég mun ekki fela það að ég er einstaklega glaður að sjá vini okkar frá Kína,“ sagði Pútín á miðvikudagskvöld þegar leiðtogarnir komu til borgarinnar, en hann lítur á Kínverja sem mikilvæga bandamenn.

Narendra Modi stakk upp á því á fundi með Pútín að kenna Rússanum jóga, en Modi er mikill áhugamaður um jóga. „Það lítur út fyrir að vera erfitt, þess vegna hef ég ekki prófað það,“ sagði Pútín.