Byrjuð að plana næstu Secret Solstice hátíð

Tæplega tíu þúsund miðar seldust á Secret Solstice-hátíðina sem fram fór í Laugardalnum um helgina. Það þýðir að minnstu munaði að uppselt yrði á hátíðina. „Það voru bara rétt tvö hundruð miðar eftir þannig að við erum mjög sátt við þessar frábæru viðtökur,“ segir Ósk Gunnarsdóttir, kynningarstjóri hátíðarinnar.

Miðinn á hátíðina kostaði tæpar tuttugu þúsund krónur en verðið var þó lægra í forsölu og þá voru ýmis tilboð í gangi. Svokallaðir V.I.P miðar kostuðu um þrjátíu þúsund krónur og má því áætla að tekjur af miðasölunni á hátíðina hafi verið nálægt 170 milljónum króna, miðað við grófa útreikninga en engin tala hefur fengist staðfest í þeim efnum.

Hátíðin heppnaðist með eindæmum vel og eru aðstandendur Secret Solstice strax farnir að huga að næstu hátíð. „Secret Solstice verður haldin aftur á næsta ári, það er pottþétt og erum við nú þegar farin að skoða bókanir fyrir næsta ár,“ segir Ósk. Hún bætir við að aðstandendur hátíðarinnar vilji þakka Reykjavíkurborg, Þrótti og þeim starfsmönnum sem reka það glæsilega íþróttaheimili, gæslunni og lögreglu kærlega fyrir frábært samstarf. „Það var líka ánægjulegt að sjá foreldra koma með börnin sín og hvað þetta var í raun mikil fjölskylduhátíð á daginn.“

Athygli vekur að engin brot voru kærð til lögreglu á þessari fjölsóttu hátíð. „Við fögnum því, það var gleðilegt að sjá hvað lögreglan var vinaleg og sýnileg á hátíðinni.“

Hátíðin var með leyfi fyrir tíu þúsund gesti og þar sem hún gekk svo vel, eru uppi vangaveltur um hvort hún verði enn stærri á næsta ári. „Við vinnum að mögulegri stækkun í samvinnu við borgina og hagsmunaaðila og því of snemmt að segja neitt að svo stöddu,“ segir Ósk.

Að hátíðinni lokinni var haldið heljarmikið eftirpartí fyrir starfsfólk og aðstandendur og komu þar fram nokkrir af þekktustu tónlistarmönnum hátíðarinnar í ár. „Partíið fór fram á leynistað og þar komu fram nokkur af þekktustu nöfnum hátíðarinnar. Hinar stjörnurnar sem tróðu upp á hátíðinni skemmtu sér vel í teitinu,“ segir Ósk spurð út í gleðskapinn. 

Veðrið lék við gesti Secret Solstice um helgina og hafði það mikil áhrif á hve góð stemning myndaðist. Helstu tónlistarmennirnir sem komu fram í ár voru Wu-Tang Clan, Kelis, Busta Rhymes og The Wailers, ásamt fjölda þekktra íslenskra listamanna.