Vona að fleiri leikmenn komast út

Íslenska U-21 árs landsliðið hefur leik í undankeppni EM 2017 í kvöld þegar Makedónía kemur í heimsókn á Vodafone-völlinn. Auk Íslands og Makedóníu eru Frakkland, Úkraína, Skotland og Norður-Írland í riðlinum.

Ísland var nálægt því að komast í lokakeppnina 2015 en miklar breytingar hafa orðið á liðinu frá síðustu undankeppni. Sjö nýliðar eru í hópnum og aðeins tveir leikmenn eiga fleiri en fjóra landsleiki að baki; Rúnar Alex Rúnarsson og Orri Sigurður Ómarsson. „Það á eftir að koma í ljós hvar við stöndum en þetta er mjög spennandi verkefni og ég hef fulla trú á því að við getum gert góða hluti,“ sagði Eyjólfur Sverrisson, þjálfari U-21 árs liðsins, í samtali við íþróttadeild 365.

Sex leikmenn í 20 manna hópi leika í atvinnumannadeildum í Evrópu. Eyjólfur vonar að góð frammistaða með landsliðinu skili fleiri leikmönnum í atvinnumennsku eins og raunin var í síðustu undankeppni. „Ég vona að við náum góðum árangri og vonandi komast þá fleiri leikmenn út,“ sagði landsliðsþjálfarinn.