Tugir þúsunda krefjast afsagnar forsætisráðherra Makedóníu

Um tuttugu þúsund mótmælendur hafa komið sér fyrir í Skopje, höfuðborg Makedóníu, til að krefjast þess að Nikola Gruevski forsætisráðherra segi af sér. Fjöldi mótmælenda heldur til í tjaldbúðum í miðborginni og neitar að fara fyrr en forsætisráðherrann segir af sér.

Gruevski er sakaður um að hafa fyrirskipað hleranir á símum þúsunda Makedóníumanna. Zoran Zaev, leiðtogi jafnaðarmannaflokksins og stjórnarandstöðunnar, hefur krafist þess að starfsstjórn taki við völdum í landinu og boði til kosninga. Gruevski telur að mótmælin séu hluti af samsæri jafnaðarmanna til að taka völdin í landinu.