Sjö ára norskur drengur fékk mark í höfuðið og lést

Sjö ára norskur drengur lést eftir að handboltamark féll á höfuð hans á miðvikudag. VG greinir frá.  Atvikið varð í Akurhus í Suðaustur-Noregi. Lögreglan rannsakar það sem slys. Flogið var með drenginn á sjúkrahús í Ósló, þar sem hann lést. Bærinn er sleginn yfir andláti drengsins.

Í tilkynningu frá Leikmannasamtökum Íslands segjast þau vilja brýna fyrir öllum sem tengjast íþróttahreyfingunni að tryggja að öll mörk séu kirfilega föst fyrir æfingar svo sambærilegur atburður verði ekki hér á landi.

„Þetta á ekki við einu sinni á dag, heldur fyrir hverja æfingu því markið gæti hafa losnað á meðan á æfingu stendur. Borgaryfirvöld og bæjarfélög eru einnig beðin um að athuga mörk og annað þar sem börn geta verið að leik á kvöldi til,“ stendur á vef Leikmannasamtakanna. „Slysin gera því miður ekki boð á undan sér og hræðilegir atburðir eins og þessir mega ekki gerast. Látum þetta ekki gerast á Íslandi.“