Sér eftir formennsku sinni í mannréttindaráði

Líf Magneudóttir segist sjá eftir formennsku sinni í mannréttindaráði Reykjavíkurborgar og telur eðlilegast að Sóley Tómasdóttir svari fyrir vendingarnar í borgarstjórnarflokki Vinstri-Grænna.

Þetta kom fram í spjalli hennar við Sigurjón M. Egilsson á Sprengisandi í morgun. Þar ræddu þau ásamt Guðrúnu Hafsteinsdóttur um fréttaefni liðinnar viku, sem og hræringarnar í stjórnmálunum í Reykjavík. Samþykkt var á fundi borgarstjórnar í upphafi mánaðarins að Sóley, oddviti Vinstri grænna, skyldi taka sæti Lífar flokkssystur sinnar í mannréttindaráði Reykjavíkurborgar. Jafnframt varð Sóley formaður ráðsins.

Sjá einnig: Sóley ýtir Líf til hliðar og fer sjálf í formanninn

Líf hafði gegnt formennsku í mannréttindaráði borgarinnar um nokkurt skeið. Hún var skipuð formaður ráðsins þegar meirihluti var myndaður í borginni í júní 2014 en á sama tíma tók Sóley við hlutverki forseta borgastjórnar. Á Sprengisandi sagðist Líf ekki getað svarað til um það hvort hún hafi stigið á tær Sóleyjar í aðdraganda breytinganna á mannréttindaráði. Það hafi hún í það minnsta ekki gert viljandi.

„Ég hef bara verið að sinna minni vinnu og vanda mig eins og maður á að gera í stjórnmálum. Ég held að það sé bara eðlilegt að hún svari fyrir þetta,“ sagði Líf og vísaði þar til Sóleyjar. 

Þegar hún var spurð hvort hún sæi eftir formennsku sinni í ráðinu sagði hún: „Já, já. Það eru mörg skemmtileg verkefni framundan sem ég kem til með að sakna en ég bara læt til mín taka þá á öðrum vettvangi,“ segir Líf sem verður formaður borgarmálahóps Vinstri grænna og þá situr hún í skóla- og frístundaráði fyrir hönd flokksins. 

Sjá einnig: Afar skiptar skoðanir innan VG með ákvörðun Sóleyjar

Eins og frægt er orðið sigraði Sóley sigraði Líf  í formannskjöri í borgarstjórnarflokknum með minnsta mögulega mun, einu atkvæði, á sínum tíma.

Sjónvarpfrétt Stöðvar 2 eftir þær kosningar hjá  má sjá hér að neðan.

Þegar Líf var spurð hvort að það hafi sett svip sinn á samstarf þeirra kom eilítið fát á Líf sem svaraði: „Ekki hvað mig varðar. Ég ákvað að bjóða mig fram í annað sætið og gerði það. Ég er í öðru sæti og sinni því bara eins og mér ber skylda til að gera,“ sagði Líf og bætti við: 

„Ég meina, pólitíkin er ævintýraleg. Það gerist alltaf eitthvað. Stundum vonbrigði en það sem skiptir mestu máli er að einbeita sér að verkefnunum framundan. Maður situr í umboði kjósenda, þeir kjósa mann til einhverra verka og það er það sem maður á að gera. Maður á að láta allan persónulegan ágreining til hliðar.“   

Hún segir að í grunninn snúist pólitíkin ekki um titla og heiti heldur séu það fyrst og fremst verkefnin sem einkenna stjórnmálin. „Ég held að við þurfum bara að sameinast í því þá fyrst að svona er komið,“ segir Líf. 

Spjall þeirra Sigurjóns og Guðrúnar má heyra í spilaranum hér efst í fréttinni.