Í tæplega þriggja ára fangelsi fyrir vörslu barnakláms

Jón Sverrir Bragason hefur verið dæmdur til tveggja ára og átta mánaða fangelsisvistar fyrir vörslu á barnaklámi. Jón var stöðvaður af tollgæslunni í Flugstöð Leifs Eiríkssonar þann 1. ágúst í fyrra vegna gruns um að tölvur og minnislyklar sem hann hafði meðferðis innihéldu ólöglegt myndefni.

Samkvæmt ákæru hafði Jón í vörslum sínum og skoðað samtals 45.236 ljósmyndir og 155 kvikmyndir sem sýna börn á kynferðislegan og klámfenginn hátt.

Myndefnið var ýmist á spjaldtölvu, fartölvum, minnislyklum og utan á liggjandi hörðum diskum. Í einhverjum tilvikum höfðu myndum eða kvikmyndum verið eytt af þessum tækjum. Voru munirnir haldlagðir og við rannsókn mun hafa komið í ljós mikið magn af meintu barnaklámi. Jón var tekinn í skýrslutöku og fór húsleit fram á dvalarstað hans hér á landi þann 19. ágúst í fyrra þar sem haldlagðar voru tölvur og gagnavörslumunir auk óskráðs loftriffils.

Neitaði sök

Jón neitaði sakargiftum hjá lögreglu og bar við að aðrir hafi haft aðgang að spjaldtölvu hans erlendis og hugsanlega hafi þeir halað niður umræddu efni en einnig hafi hann keypt notaða minnislykla á markaði í Kína og vera kynni að efnið hafi verið þar fyrir. Honum var með dómi gert að sæta farbanni þann 26. ágúst í fyrra og hefur sætt farbanni óslitið frá þeim tíma. Jón Sverrir er með lögheimili í Sameinuðu arabísku furstadæmunum.

Myndir af nöktum drengjum

Við þingfestingu neitaði hann einnig sök sem og ítrekaði afstöðu sína við aðalmeðferð málsins. Aðalvarðstjóri hjá tollstjóra var kallaður til vitnis og sagðist hafa stöðvað Jón Sverri við komu til landsins og skoðað tölvur og minnislykla sem hann hafði meðferðis. Jón Sverrir opnaði sjálfur spjaldtölvu að sögn aðalvarðstjórans og komu í kjölfarið í ljós myndir af nöktum drengjum. Aðalvarðstjórinn sagðist hafa áður stöðvað Jón Sverri með mikið magn minnislykla án þess að þeir hafi þá verið skoðaðir.

Braut gegn þroskaskertum dreng

Aðalvarðstjórinn ákvað að skoða nánar hver ákærði væri og þá séð að hann var á reynslulausn og því ákveðið að skoða hann næst þegar kom til landsins. Jón Sverrir hafði árið 2010 verið dæmdur í fangelsi í þrjú ár og sex mánuði fyrir brot með því að hafa í nokkur skipti tælt þroskaskertan dreng til kynmaka. Í dómi Héraðsdóms Reykjaness vegna vörslu Jóns Sverris á þessu myndefni kemur fram að hann eigi sér engar málsbætur og því dæmdur til tveggja ára og átta mánaða fangelsisvistar og þóttu ekki efni til að skilorðsbinda refsingu hans að hluta eða öllu leyti.