Rússar eru í vondum málum eftir tap á heimavelli

Austurríkismenn gerðu sér lítið fyrir og lögðu Rússa af velli í Rússlandi með einu marki gegn engu. Marc Janko skoraði sigurmarkið í fyrri hálfleik með laglegri bakfallsspyrnu.

Austurríki er langefst í G-riðli með 16 stig eftir 6 leiki. Rússar eru hins vegar í slæmum málum, með 8 stig eftir 6 leiki.

Úkraína var ekki í miklum vandræðum með að sigra Lúxemborg í Kíev. Artem Kravets, Denys Garmash og Yevhen Konoplyanka sáum til þess að Úkraína vann 3-0.

Úkraína er með 12 stig í 3. sæti C-riðils, jafnmörg stig og Spánn sem mætir Hvít Rússum í kvöld. Lúxemborg er með 1 stig á botni riðilsins.

Eistland vann sinn annan leik í E-riðli þegar San Marínó kom í heimsókn. Sergei Zenjov skoraði bæði mörk Eista, það fyrra á 35. mínútu og það síðara á 63. mínútu.

Eistar komust þar með upp fyrir nágranna sína í Litháen, sitja í 4. sæti riðilsins með 7 stig en San Marínó er á botninum með 1 stig.

Þá skildu Liechtenstein og Moldavía jöfn, 1-1, í G-riðli. Moldavía er í neðsta sæti riðilsins með 2 stig en Liechtenstein er í því næstneðsta með 5 stig.