Zlatan skoraði tvö - lítil reisn yfir sigri Spánverja

Zlatan Ibrahimovic skoraði tvö mörk í 3-1 sigri Svía á Svartfellingum en leikið var á Friends Arena í Stokkhólmi. Þessi lið eru í G-riðli og eftir leikinn eru Svíar í 2. sæti með 12 stig, 4 stigum á eftir Austurríki.

Það var lítil reisn yfir sigri Spánverja á Hvít-Rússum í C-riðli þegar liðin mættust í Minsk í kvöld. Spánverjar unnu 1-0 með marki David Silva á 45. mínútu og það dugði til sigurs.

Annar leikur fór fram í C-riðli í kvöld þegar Slóvakar unnu Makedóníu með tveimur mörkum gegn einu. Slóvakar komust í 2-0 áður en Makedóníumenn minnkuðu muninn en það var Marek Hamsik, leikmaður Napoli, sem gerði síðara mark Slóvaka.

Slóvakar eru í efsta sæti C-riðils með 18 stig og Spánverjar koma næstir með 15 stig. Hvít-Rússar eru í 4. sæti með 4 stig og Makedóníumenn í því fimmta með 3 stig.

Þá unnu Svisslendingar 2-1 sigur á Litháen í Litháen eftir að hafa lent 0-1 undir. Xherdan Shaqiri skoraði sigurmark Svisslendinga á 84. mínútu.

Sviss er í 2. sæti E-riðils eftir þennan leik með 12 stig, 6 stigum á eftir Englandi sem situr á toppnum. Litháar eru hins vegar í 5. sæti með 6 stig eftir 6 leiki.