Telja víst að Belmokhtar sé fallinn

Bandaríkjaher segist hafa fellt fyrrum leiðtoga Al-Kaída í Líbíu í gær. Sá hefur ekki verið nafngreindur en stjórnvöld í Líbíu telja það vera Mokhtar Belmokhtar. Áður hefur verið fjallað um dauða hans, eða árið 2013, þegar talið var að hann hefði fallið í bardaga í Afríku. Þá hefur hann í tvígang verið dæmdur til dauða, en aldrei tekist að hafa hendur í hári hans.

Belmokhtar var eitt sinn háttsettur leiðtogi hjá Al-Kaída hryðjuverkasamtökunum í Norður-Afríku. Hann klauf sig frá samtökunum og stofnaði sín eigin en talið er að liðsmenn þeirra hafi skipulagt og staðið að gíslatökunni í gasverksmiðjunni í Alsír árið 2013 þar sem 39 voru myrtir.