Messi segist saklaus

Lionel Messi heldur enn fram sakleysi sínu í skattamáli sínu á Spáni en hann hefur ásamt föður sínum, Jorge, verið ákærður fyrir skattsvik.

Feðgarnir eru sakaðir um að hafa svikist undan því að greiða skatt af launum Messi á árunum 2007-2009 með því að notast við skattaskjól í Belize og Úrúgvæ.

Óvíst er hvenær réttarhöldin fram en líklegt er að Messi yngri verði kallaður til sem vitni. Hann hefur ávallt haldið fram sakleysi sínu.

Málið hefur verið í dómskerfinu á Spáni í tvö ár og hafa þó nokkrir dómarar komið að því. Á dögunum fór saksóknari fram á að málið gagnvart Lionel Messi yrði látið niður falla en dómarinn féllst ekki á það og sagði að það væri rökstuddur grunur um að báðir aðilar hefðu gerst brotlegir.

Yfirlýsing birtist á heimasíðu Barcelona í gær þar sem félagið hét fullum stuðningi sínum við Messi og fjölskyldu hans.

Messi og faðir hans munu hafa greitt skattayfirvöldum á Spáni meira en fimm milljónir evra eftir að málið kom upp en það nær yfir þá upphæð sem þeir eru sakaðir um að hafa skotið undan auk vaxta.