Fjórða tap Lokeren í röð

Sverrir Ingi Ingason lék allan leikinn í vörn Lokeren sem laut í gras fyrir OH Leuven í belgísku úrvalsdeildinni í fótbolta í kvöld. Lokatölur 1-2, OH Leuven í vil.

Það hefur allt gengið á afturfótunum hjá Lokeren á tímabilinu en liðið hefur tapað fjórum leikjum í röð og situr í 15. og næstneðsta sæti deildarinnar með aðeins átta stig eftir 11 umferðir.

Sverrir hefur leikið níu af 11 deildarleikjum Lokeren á tímabilinu en hann kom til liðsins frá Viking í Stavanger í febrúar á þessu ári.