Umboðsmaður Zlatans: Hann verður áfram hjá PSG

Umboðsmaður Zlatans Ibrahimovic segir að sænski framherjinn sé ekki á förum frá Paris Saint-Germain.

Zlatan, sem verður 34 ára síðar á árinu, hefur verið orðaður við brottför frá PSG og hafa AC Milan og lið í Bandaríkjunum verið nefnd sem mögulegir áfangastaðir Svíans sem kom til PSG sumarið 2012, einmitt frá Milan þar sem hann lék um tveggja ára skeið.

Eftir að PSG tryggði sér franska bikarmeistaratiilinn sagði Nasser Al Khelaifi, forseti félagsins, að Zlatan yrði áfram í París. Og Mino Raiola, umboðsmaður framherjans, hefur nú tekið í sama streng.

„Hann er samningsbundinn PSG og getur ekki farið frá félaginu,“ sagði Raiola en Zlatan á ár eftir af samningi sínum við frönsku meistarana.

Zlatan skoraði 30 mörk í 35 leikjum fyrir PSG á nýafstöðnu tímabili en liðið vann þrennuna í Frakklandi; deildina, bikarkeppnina og deildarbikarinn.