Íslendingaliðin töpuðu bæði í lokaumferðinni í Kína

Lokaumferð kínversku úrvalsdeildarinnar fór fram í dag.

Viðar Örn Kjartansson, Sölvi Geir Ottesen og félagar þeirra í Jiangsu Sainty biðu lægri hlut, 3-1, fyrir Shanghai Shenhua á útivelli. Demba Ba, fyrrum leikmaður Newcastle United og Chelsea, gerði öll mörk Shanghai í leiknum.

Viðar og Sölvi léku allan leikinn fyrir Jiangsu sem endaði í 9. sæti deildarinnar en liðið fékk aðeins þrjú stig úr síðustu sjö leikjum sínum.

Viðar var markahæsti leikmaður Jiangsu í deildinni með níu mörk í 28 leikjum en hann kom til liðsins frá Vålerenga fyrir tímabilið. Sölvi skoraði þrjú mörk í 26 leikjum.

Eiður Smári Guðjohnsen lék allan leikinn fyrir Shijiazhuang Yongchang sem tapaði 3-1 fyrir Shandong Luneng á útivelli. Shijiazhuang endaði í 7. sæti deildarinnar en 15 af 30 leikjum liðsins á tímabilinu enduðu með jafntefli.

Eiður skoraði eitt mark í 14 leikjum fyrir Shijiazhuang á tímabilinu en liðið tapaði tveimur síðustu deildarleikjum sínum.

Guangzhou Evergrande varð kínverskur meistari, fimmta árið í röð.