Mótmæltu seinagangi við björgunarstörf

Fjölskyldur um fjögurhundruð manns sem óttast er að hafi drukknað á Yangtse ánni í Kína á dögunum þegar skemmtiferðaskipi hvolfdi á ánni efndu til mótmæla við slysstaðinn í gærkvöldi. Til uppþota kom þegar fólkið krafðist meiri upplýsinga um málið en enn sem komið er hafa yfirvöld aðeins staðfest að sextíu og fimm séu látnir.

Enn eru menn við störf í skipinu sem marar í hálfu kafi en veðurskilyrði á ánni hafa verið mjög slæm síðustu daga. Aðeins fjórtán af farþegunum 456 hafa fundist á lífi en björgunarmenn segja enn möguleika á því að fólk gæti verið á lífi inni í flakinu.