Tsarnaev vildi refsa Bandaríkjunum

Saksóknari í Bandaríkjunum hefur greint kviðdómi frá því að Dzhokar Tsarnaev hafi ásamt bróður sínum „viljað refsa Bandaríkjunum“. Dzhokar og Tamerlan Tsarnaev skipulögðu sprengjutilræði í Boston-maraþoninu í apríl 2013.

Lögmenn Tsarnaev viðurkenna að hann hafi staðið fyrir árásinni en að hann hafi verið undir áhrifum frá róttækum bróður sínum.

Í frétt BBC segir að ef hinn 21 árs gamli Tsarnaev verði fundinn sekur muni hann annað hvort hljóta lífstíðarfangelsisdóm eða dauðadóm.

Ákæran á hendur Tsarnaev er í þrjátíu liðum.

Þrír létust og 260 særðust í árásinni, en þar að auki lést einn lögreglumaður þegar leit að bræðrunum stóð yfir.

Lögmenn fluttu lokaræður sínar í réttarhöldunum í dag.