Asprilla: Neymar á heima í Hollywood

Faustino Asprilla, fyrrverandi leikmaður Newcastle og kólumbíska landsliðsins í fótbolta, hefur fátt gott um brasilísku ofurstjörnuna Neymar að segja eftir leik Kólumbíu og Brasilíu í Suður-Ameríkukeppninni í gærkvöldi.

Kólumbía vann sögulegan 1-0 sigur á Brasilíu og fékk Neymar rautt spjald eftir leik þegar liðin tókust á.

Neymar fékk reisupassann fyrir að sparka boltanum að Pablo Armero, leikmanni Kólumbíu, rétt eftir að leikurinn var flautaður af. Carlos Bacca brást illa við, ýtti við honum, og fékk þá líka að líta rauða spjaldið.

Neymar kenndi dómaranum Enrique Osses um allt saman eftir leik og sagði að hann hefði verið pirraður þar sem Osses tók ekki á neinu í leiknum og leyfði Kólumbíu að spila fastar en Brössum.

Asprilla finnst lítið til ummæla Neymars koma og skrifaði á Twitter síðu sína: „Neymar er fótboltalygi. Neymar, farðu bara að koma þér til Hollywood.“

Vegna rauða spjaldsins missir Neymar af lokaleik Brasilíu í riðlinum gegn Venúsúela.