Eigandi og forseti Olympiakos sakaður um að vera glæpaforingi

Vangelis Marinakis, eigandi og forseti gríska meistaraliðsins Olympiakos, hefur verið settur í bann frá knattspyrnu á meðan rannsókn um hvort glæpasamtök stýri gríska boltanum fer fram.  Frá þessu er greint á vef Sky Sports.

Marinakis var sleppt lausum gegn 200.000 evra tryggingu eftir sjö klukkustunda langa yfirheyrslu og þarf að tilkynna sig inn til lögreglunnar á 15 daga fresti.

Hann er sakaður um að vera hluti af og stýra glæpasamtökum auk þess sem hann hefur stundað og aðstoðað við fjárkúganir, mútur og fjármálasvindl.

Marinakis þarf að hætta sem forseti Olympiakos en má áfram stýra eignarhaldsfélaginu sem heldur utan um öll mál knattspyrnufélagsins Olympiakos.

Þetta mál gæti haft miklar afleiðingar fyrir Olympiakos, en Panathinakos og PAOK Salonika, liðin sem enduðu í öðru og þriðja sæti deildarinnar, eru að gera kvartanabréf klár sem verða send til UEFA.

Þau vilja að Olympakos verði meinuð þátttáka í Evrópukeppni á næsta tímabili, en það yrði mikið tekjutap fyrir Olympiakos að verða af Meistaradeildarsætinu.

Yfirheyrsla Marinakis fór fram aðeins sólarhring eftir að fyrrverandi formaður gríska knattspyrnusambandsins, Giorgos Sarris, var settur í bann frá fótbolta.