Perú vann brons í Síle

Perú hirti þriðja sætið í Suður-Ameríkukeppninni með 2-0 sigri á Paragvæ í leik liðanna í Síle í nótt. Bæði mörkin komu í síðari hálfleik.

Staðan var markalaus í hálfleik, en Andre Carrillo kom Perú yfir strax á þriðju mínútu síðari hálfleiks.

Paragvæ reyndi og reyndi að jafna metin, en Perú gerði út um leikinn á 89. mínútu. Þá skoraði Jose Paolo Guerrero og lokatölur 2-0.

Perú hafnar því í þriðja sætinu í Suður-Ameríkukeppninni í ár, en Paragvæ í því fjórða. Úrslitaleikurinn milli Argentínu og Síle fer fram í kvöld.