Vilja fá sjö stjórnendur hjá FIFA framselda

Bandarísk stjórnvöld hafa farið fram á að sjö háttsettir stjórnendur hjá Alþjóða knattspyrnusambandinu FIFA verði framseldir frá Sviss. Formlega var farið fram á framsalið í gær.

Sjömenningarnir voru meðal þeirra fjórtán sem handteknir voru vegna gruns um umfangsmikla og langvarandi spillingu. Handtökurnar voru gerðar í kjölfar rannsóknar bandarísku alríkislögreglunnar.

Verjendur sjömenninganna hafa nú fjórtán daga til að andmæla flutningnum en svissnesk yfirvöld hafa bent á að líklega muni öllum ákvörðunum verða skotið til dómstóla og áfrýjað þar; það gæti tekið langan tíma að fá niðurstöðu um hvort einstaklingarnir verði framseldir.