Sjöunda hákarlaárásin á þremur vikum

68 ára gamall maður varð fyrir hákarlaárás við strendur Norður-Karólínu í gær. Um er að ræða sjöundu árásina við strendur Norður-Karólínu á einungis þremur vikum. Vitni segja manninn hafa verið á sundi einungis tíu metra frá ströndinni þegar hann var bitinn og dreginn undir sjávaryfirborðið.

Dýpt sjávar þar sem árásin átti sér stað er sögð vera rétt rúmur metri.

Hann er einnig sagður hafa reynt að reka hákarlinn á brott, sem var rúmir tveir metrar að lengd, en Andrew Costello særðist á bringunni, báðum höndum, öðrum fætinum og mjöðminni. Hann var fluttur á sjúkrahús með sjúkraflugi og var ekki í lífshættu í gær.

Einungis nokkrum klukkustundum eftir árásina var fólk aftur komið í sjóinn við Oracoke eyju.

Í samtali við ABC News segir vísindamaðurinn George Burgess að ástandið við strendur Norður-Karólínu. Hann hefur, ásamt lögreglu, farið fram á að ströndum verði lokað um tíma.

Miðað við fjölda árása undanfarnar þrjár vikur segir hann það nánast öruggt að einhver verði fyrir árás um næstu helgi.

Þjóðhátíðardagur Bandaríkjanna er á laugardaginn og ljóst að fjölmargir munu leggja land undir fót og heimsækja strendur Bandaríkjanna.

Um síðustu helgi drógu tveir menn hákarl á land við strendur Norður-Karólínu. Þeir slepptu honum þó aftur út í sjó.