Óvæntur fundur á bókasafninu

Það sem er talið vera elsta útgáfa af Kóraninum sem vitað er af fannst óvænt á háskólabókasafninu í Birmingham.

Rannsakandinn Alba Fedeli rakst á síður úr Kóraninum fyrir slysni á bókasafninu og lét kolefnisgreina þær. Í ljós kom að síðurnar eru minnst 1.370 ára gamlar. Síðurnar voru faldar á meðal handrita frá miðöldum en talið er að þær hafi legið á bókasafninu í rúma öld.

Kolefnisgreiningar bentu til að síðurnar séu frá árunum rétt eftir dauða Múhameðs spámanns en spádómar hans eru megininnihaldið í texta Kóransins. Múslimar trúa því að textinn í Kóraninum sé boðskapur engilsins Gabríels sem birtist Múhameð yfir 22 ára tímabil frá árinu 610.

Muhammad Afzal, sérfræðingur bókasafnsins í fornum handritum, segir að fundurinn sé stórmerkilegur og ætti að vekja upp fögnuð meðal múslima. Hann segir að á þeim tíma sem handritið var skrifað hafi samfélög múslima verið afar fátæk og ekki haft burði til að fjölrita handrit af þessum toga. Því sé þetta eintak einstakt.