Svíþjóðardemókratar mælast næststærstir

Svíþjóðardemókratar mælast með 23,3 prósent fylgi í nýrri skoðanakönnun og er því orðinn næststærsti flokkur Svíþjóðar.

Þetta kemur fram í nýrri könnun Sentio sem gerð var fyrir Nyheter Idag.

Þetta er í fyrsta sinn sem flokkurinn mælist stærri en borgaralegi flokkurinn Moderaterna sem nýtur stuðnings 20,8 prósent kjósenda.

Svíþjóðardemókratar eiga ekki langt í land að verða stærstur, en Jafnaðarmannaflokkurinn mælist með 24,1 prósent fylgi.

Leiðtogar Svíþjóðardemókrata hafa sagt að flokkurinn stefni ótrauður á að verða stærsti flokkur landsins.

Vinstriflokkurinn, Græningjar og Miðflokkurinn mælast allir með rúmlega sex prósenta fylgi, Þjóðarflokkurinn rúmlega fjögurra prósenta fylgi og Kristilegir demókratar 3,1 prósenta fylgi.