Tveir milljarðar í súginn á einu ári

„Það er sóun ef við erum hér að sinna hlutverki hjúkrunarheimilis fyrir allt að hundrað manns í plássum sem kosta nærri 100 þúsund krónur á dag þegar Hrafnista getur gert það sama fyrir 20 þúsund krónur á dag,“ sagði Páll Matthíasson, forstjóri Landspítala, á fundi hjúkrunarráðs í gær þar sem rætt var opinskátt um ýmsar áskoranir sem blasa við Landspítalanum.

Á fundinum kom fram að 78 eldri borgarar, sem bíða eftir plássi á hjúkrunarheimili eða heimahjúkrun, eru inniliggjandi á spítalanum. Þá var á fundinum rætt hreinskilnislega um rúmanýtingu langt yfir æskilegu viðmiði, álag á starfsfólk, öryggismörk hjúkrunar og bresti í heilbrigðisþjónustu utan Landspítala sem hafa áhrif á þjónustuna.

Öryggisógn

„Það er erfitt fyrir ungan mann sem hefur beðið eftir aðgerð í eitt og hálft ár að skilja að ástæða biðarinnar er ef til vill að aldraður afi hans liggur á gangi 14E. Það stíflar allt okkar kerfi, truflar innkomu á deildir og leiðir á endanum til þess að þessi ungi maður þarf að bíða lengur eftur aðgerð. Truflun á flæði er öryggisógn,“ ítrekaði Páll.

Sífelld fjölgun

Dagbjört Þyrí Þorvarðardóttir, deildarstjóri flæðisdeildar, sagði að þótt að hlutfallslega fleiri sjúklingar kæmust inn á hjúkrunarheimili af spítalanum vegna breyttra reglna um vistunarmat þá dygði það ekki. Sífellt fjölgi þeim sem liggja inni, það þurfi að byggja fleiri hjúkrunarrými.

„Það er alltaf að fjölga í þessum hópi. Núna erum við með 78 einstaklinga með samþykkt vistunarmat sem liggja inni hjá okkur. Það tekur vanalega um tvo til þrjá mánuði fyrir þessa einstaklinga að fá samþykkt mat um að komast á hjúkrunarheimili, og vanalega eru þessir einstaklingar búnir að liggja lengi hjá okkur áður en það ferli hefst. Þegar það losnar hjúkrunarpláss þá er alltaf einhverjum á Landspítalanum boðið plássið ásamt einhverjum öðrum úti í bæ.

Þetta hjálpaði okkur mikið fyrir nokkrum árum og þá voru opnuð ný hjúkrunarheimili sem drógu úr innlögnum. En nú erum við komin hingað,“ segir Dagbjört og vísar í að hópurinn stækki ört ár frá ári án þess að fyrir liggi aðgerðir af hálfu ríkis og sveitarfélaga til að stemma stigu við vandanum.

Brestir í heimahjúkrun

„Ég veit ekki til þess að það sé neitt á teikniborðinu. Þrátt fyrir að okkar sjúklingar komist í auknum mæli inn á hjúkrunarheimili þá fjölgar samt í þessum hópi. Það er brýnt að finna úrræði fyrir þennan hóp.“

Dagbjört segir bresti í heimahjúkrun einnig leiða til þess að eldri borgarar eru ekki útskrifaðir af spítalanum.

„Það sem við erum að finna fyrir núna er ekki bara að fólk komist ekki á hjúkrunarheimili heldur líka að það kemst ekki heim til sín vegna þess að það fær ekki heimahjúkrun sem skyldi. Það er engin þjónusta um kvöld og helgar í Hafnarfirði og Garðabæ. Það er ekki hægt að útskrifa fólk sem fær ekki þá heimahjúkrun sem það þarf,“ segir Dagbjört og segist einnig hafa orðið vör við bresti í heimahjúkrun í vissum hverfum í Reykjavík. „Það er eitthvað um það að fólk hafi ekki fengið kvöld- og helgarhjúkrun í póstnúmeri 104.“